.

.

Friday, November 21, 2014

KALA JADU KI ALAMAAT SE BAKHABAR RAHEIN


Assalam oalaikum,
Woh kaun si nishaniyan hain jin se hum kala jadu ko pehchaan sakte hain ya jin se hum kala jadu aur jismani bimariyon ke beech ka farq samajh sakte hain? Ji haan, har bimari ki tarah kala jadu ke bhi alamaat hoti hain. Jis tarah koi hakeem marz ki alamaat se marz ka pata chala leta hai waise hi koi amil kala jadu ki alamaat dekh kar is roohani marz ka pata chala leta hai. Is blog ko padh ker InshaAllah kala jadu ke victims khud andaza lag sakeinge ke woh is marz mein mubtila hain ke nahin.
Zindagi mein hone wale tajurbaat se insan kya kuch nahin seekhta. Lekin zindagi se insan kitna seekh paata hai yeh is baat per munhasar hai ke woh kitni hoshmandi se jeeta hai. Baaz log kuch ghaltiyan karte hain lekin kuch nahin seekhte yahan tak ke woh phir se usi ghalti ko dohraate hain aage chal ker. Baaz log ek baar ghalti kar ke sambhal jaate hain. Lekin hum mein se daanishmand woh hote hain jo apni nahin balki dusron ki ghaltiyon se seekh lete hain. Yani unhe kuch seekhne ke liye khud mun ke bal girna zaruri nahin hota balki woh auron ke tajurbe se bhi seekh lete hain aur apne tajurbe mein izaafa kar lete hain. Hum mein se kai log aise hain jo kala jadu se la-ilm aur bekhabar rahna pasand karte hain kyunki woh us per yaqeen hi nahin karte hain halanki Quran Paak mein saekdon maqaamaat per kala jadu ka zikr hai jo is baat ka suboot hai ke yeh ek haqeeqat hai. Lekin phir bhi kuch log ahmaqon ki jannat mei rahna pasand karte hain. Is la-imi ke waje se unke apne kai masle hal nahin ho paate honge kyunki woh un maslon ki haqeeqat nahin samajh paate hain. Lehaza agar khud per na bhi guzri ho ya aisa lagta ho ke hum per na to kabhi guzri hai aur na hi guzregi to aise mein bhi zara theher ker sochein ke behtereen ilaj ke bawajud bimariyon ko shifa kyun nahin milti? Edi choti ka zor lagaane ke bawajud masle hal kyun nahin hote? Har khoobi hone ke bawajud ladke ladkiyon ki shadi mein rukaawatein kyun aati hain? Har aaraish hone ke bawajud bhi zehen ko sukoon kyun nahin milta? Ek anjaana sa khauf dil mein kyun bhara rahta hai? Subah ko bedaar hone per aisa kyun mehsus hota hai jaise hum raat mein soye hi nahin? Is tarah ke khwab kyun nazar aate hain jo dil bura kar dete hain? In tamaam sawaalaat ka jawab dhundna ashad zaruri hai warna hum andhere mein hi rah jaenge aur badhawaasi hame kisi aziyat mein mubtila kar degi.
Is liye kala jadu ki tamaam nishaniyan se baakhabar rahne mein hi aafiyat hai.


Duaaon mein yaad rakhein
Amel Soname


SHADI PER BANDISH KI ALAAMAAT


Assalam oalaikum,

Shadi per bandish ek tarah ka kala jadu hota hai jis ke waje se victim ki shadi nahin ho paati hai. Is ki sab se khaas alaamat yeh hoti hai ke victim, chahe woh mard ho ya aurat, khud shadi se saaf inkar karne lagta hai aur woh bhi bina kisi mantiq ke. Ab jab koi khud zid per ad jae ke us ko shadi nahin karni hai to aise mein ghar walon ko kafi aziyat ka saamna karna pad sakta hai. Rishton ki chahe kataar lag jae lekin koi nateeja nahin saamne aata. Jab koi apni shadi ke maamle mein itni baddili aur laparwahi se kaam lega to us ka anjaam acha kaise ho sakta hai.
Aise mein agar victim ke ghar wale kala jadu ki alamaat se baqhubi waqif hon to masla hal ho sakta hai sahi waqt per. Lekin baaz awqaat kala jadu ke maamle mein bekhabri ke waje se asli masla kisi ke samajh mein hi nahin aata aur sab bewaquf ban jaate hain. Nateeja yeh nikalta hai ke victim ko zid per ada hua dekh ker sab ghar wale ghutne tek dete hain aur us ko uske haal per chhor dete hain. Koi is masle ki teh tak pahunchne ki koshish nahin karta hai ke shadi jaise aham maamle mein victim akhir dilchaspi kyun nahin le raha hai? Zyada se zyada aqil se kaam lenge to victim ki inkar ki waja us ki kisi qism ki afusrdagi ya manfi soch se mansub kardenge.
Kuch alamnaak qism ke maamlaat mein is qism ka kala jadu victims ke aziz hi karwa dete hain aur sab se yeh kah kar ke victim khud shadi nahin karna chah raha hai woh us ki shadi ke mamle ko hamesha ke liye dabaa dete hain. Yeh zyada tar laalchi qism ke log karwate hain jinhe victim ki shadi se hone kuch maali nuqsaan ka andesha hota hai. Zaahir si baat hai ke agar victim ki shadi per us ki bhabhi ne bandish lagwaa di ho to woh tanha hi rah jaega. Na to uski biwi hogi aur hi aulaad. Aise mein jaaedad ke batwaare ke waqt us ki bhabhi ko faeda ho jaega aur daulat us ke bachon mein taqseem hojaegi. Agar kisi shakhs ka halqa itna khatarnaak ho to aise mein woh mehfuz sirf tab rah sakta hai jab woh kala jadu ke bare mein bakhabar ho.
Kuch deegar dardnaak maamlaat mein victim ki shadi rukwaane ke liye us ke dushman us ko jinsi taur per kamzor karwaa dete hain. Zahir hai ke aisi surat e haal mein victim shadi ke naam se katraaega.
Is ke alaawa kala jadu ke jinnat victim ke zehen mein shadi ki bahut hi manfi tasweer pesh karte hain jis ke waja se victim shadi se badzann hojaata hai. Yeh sab tab hota hai jab victim kala jadu ki alaamaat se waaqif nahin hota aur is ke sabab jinnati waswason aur qudrati khayaalon ke beech ke farq ko bhaamp nahin paata hai.

Duaaon mein yaad rakhein
Amel Soname



KALA JADU KI AAM ALAAMAAT


Assalam oalaikum,
Kala jadu ki iqsaam beshumaar hain. Haasid ko shaitan kis tarah se behkaaega aur woh victim ko kis tarah se nuqsan pahunchana shuru karde- yeh koi nahin kah sakta. Koi dushman victim ki khushiyon ke piche pada hua hota hai to koi shadi ke, koi mulazimat ki to koi uski azdawaaji zindagi ki. Koi hasid victim ke lambe baalon ke piche pada hua hota hai to koi us ke baal- bachon ke. Bas yun samajh lein ke jo shae victim ke paas achi dekh li bas fauran us shae ko barbaad karne ki zordar koshish mein lag jate hain hasid. Ab chahe woh victim ki khubsurti jaisi koi sat’hi shae ho ya us ke kirdar jaisi gehri shae, victim ki sehat jaisi koi na-guzeer shae ho ya zahaanat jaisi zaruri, sab daao per lag jati hain kala jadu ke waje se. Haasid ko sirf jadugar tak pahunch ker aur apna jhuta dukhda sunaana hota hai aur paison ke lalchi jadugar bina Allah (swt) ke khauf ke bhole bhale logon ko nuksan pahunchaane mein masruf ho jaate hain.
Zahir hai ke mukhtalif qism ke jadu ke asaraat aur unki alaamaat bhi ek dusre se alag hogi. Is ke bawajud aisi kai alamaaat hoti hain jo aam taur per har qism ke jadu ke ibteda mein paai jaati hain. Is baat se sab waqif hain ke sifli jadu jinnat ke madad se karte hain jadugar. Yani ke jab jadugar jadu karega to us ke ishaare per us ke maatehet jo jinnat honge woh victim tak ja pahunchenge aur usko ya to zehni taur per apna (victim ke dushman ka) ghulam banana ki koshish karienge ya phir us ko jismaani takleef mein mubtila karne ki koshish karienge. Zehni taur per apna ghulam banana se pahle jinnat ko kafi paapad belne pad jaate hain khas taur se tab agar victim deendar ho aur uska quwwat- e- iraada agar mazbut ho. Agar che victim deendaar ho, aqil-e-saleem ka maalik ho aur woh apna zyadatar waqt Allah (swt) ki Ibadaah aur Dhikra mein guzarana pasand karta hai duniya ki mughallezaat ke bajae to aise mein sifli ke jinnat ko kafi takleef ho sakti hai. Sifli ke jinnat ko victim ke zehen ko apne qabu mein karne ke liye us ko daraana dhamkaana padta hai aur ulte seedhe kaam karne per amaadah karna padta hai. Zaahir hai ke jo shakhs sirf Allah (swt) se darega us ko yeh jinnat kis tarah qabu mein kar sakte hain.
Bahrahaal, har qism ke jadu mein jinnat jab victim ke qareeb pahunch kar aur us per jadu karna shuru karte hain to aam taur per yeh alaamaat hoti hain:
1.    Jinnat ke insani jism mein daaqhil hone ke sabab victim ko sote waqt jhatka lagta hai jisse us ki ankh aksar khul jati hai.
2.    Jaagte waqt victim ke jism mein agar koi jinn daaqhil hona chah raha ho to us ki ankh phadphadaane lagti hai. Victim agar jadu ki alaamaton se baaqhabar na ho to woh kaun si ankh phadak rahi hai yani ke daain ya baain is baat per ghaur kar ke aur yeh sochne mein masruf ho jaata hai ke us ke sath kuch acha hone wala hai ya bura. Itne mein jinnat apna kaam karke aur shaitani waswase daal ker victim ke zehen mein aur chalte bante hain.
3.    Jab jinnat victim per jadu karne ke liye us per tut padte hain to us waqt victim ka koi bhi pattha (muscle) phadphadaane lagta hai. Agar victim bekhabar hai jadu se to woh samjhega bhi nahin ke yeh kya hua. Koi mamuli si baat samajh ker us ko nazarandaz kar dega.
4.    Jab jinnat jism mein daqhil ho ker poore mein daudte hain to jild ke bilkul nichli satah per khaarish mehsus hoti hai. Victim samajhta hai ke jild ke ooper aam kharish ho rahi hai lekin khujaane se bhi us ko rahat nahin milti kyunki kharish jild ke ooper hoti hi nahin hai.
5.    Aksar aisa bhi hota hai ke zaahiri taur per koi bhi alaamat na dikhe jisse victim jinnat ki makkari ko samajh pae. Lekin zehen mein koi betuka sa waswasa aa jaata hai. Jinnat khamoshi se aa ker victim ke zehen mein waswasa daal sakte hain jis ke zariye unka maqsad daraane ka bhi ho sakta hai, behkaane ka bhi; bewakuf banaane ka bhi ho sakta hai aur uljhaane ka bhi. Ab yeh victim per munhasir hai karta hai ke woh in waswason ka kitna asar leta hai. Agar wo yeh jaanta bhi nahin yeh yeh betuke khayaal us ke zehen mein kaun daal raha hai to aise la-ilmi aur beqhabari ke aalam mein mumkin hai ke jinnat apne maqsad mein kamyab ho jaenge.
6.    Jinnat ke jism mein maujudgi ki ek alaamat yeh bhi hai ke halaq mein achanak behad gandi badboo aane lagti hai
7.    Ek alaamat yeh bhi hai ke paeron ke zariye se garmi ooper ki jaanib aati hui mehsus hoti hai.
8.    Is ke alaawa kisi bhi qism ke jadu mein moakkil ya victim ka apna humzad us ko khwabon ke zariye se aaghaah kar deta hai jadu ke bare mein.Lehaza aksar jadu ke victims ko khawabon mein nijazat dikhai deti hai jo is baat ka suboot hai ke us per palide yani ganda amal karwaya gaya hai. Agar kisi khaas sifli moakkil ka istemal kiya hai jadugar ne jaise ke chupkali moakkil ya ullu moakkil to phir wahi moakil khwab mein dikhai deta hai. Yeh ek ishara hota hai qudrat ke taraf se taaki victim chawkanna hojae aur apna roohai ilah kare magar aksar log khawabon ko koi ghaer zaruri shae samajh ker apne khwabon ko nazarandaz kar dete hain.
9.    Agar victim deendar hai to aise mein jadu asar nahin karega.Lehaza sifli ke jinnat aise victims ko deen se dur karne ki koshish karte hain. Victim ke zehen mein waswasa daalte hain ke ‘Tumhe namaz padhne mein badi takleef ho rahi hai’. Victim agar jinnat ki makkari na samajh paya to woh namaz se dur bhaagne lagta hai.   
To yeh kuch aam alaamaat thin jin se victim aasaani se samajh sakta hai ke us ke sath kya ho raha hai. Yeh alaamatien kisi bhi qism ke jadu ke ibteda mein dekhi ja sakti hain. Agar in alaamaton ko nazarandaz kar diya jaae bekhabri ke aalam mein aur victim apna roohani ilaj na kare to phir yehi alaamatein phuqhta aur khaufnaak hoti chali jaati hain. Jaise beemari ke aakhri marhale mein koi agar mareez ko hakeem ke paas le ker pahunche to hakeem dekh ker yahi kahega ke, ‘Bahut der ho chuki hai’. Yahi qissa tab bhi pesh aa sakta hai jab kisi jadu ke victim ko sab liye baithe rahein aur us per jadu ka asar badhta chala jae.

Duaaon mein yaad rakhein
Amel Soname




HALAAKAT WALE JADU KI ALAAMAAT


Assalam oalaikum,

Jab yeh duniya qaayam hui thi to Hazrat Adam (as) ke bĂȘte Qaabil ne hasad ke waje se apne bhai Haabil ka qatal kar diya tha. Yeh is duniya ka pahla qatal tha- lekin aakhri nahin. Hasad, dushmani aur laalach ke waje se qatal karna har daur mein aam baat raha hai aur rozana akhbaaraat aur tv ki news per humlog khoon kharaabe ki khabrein sunte rahte hain. Lekin is qism ki qatal chaqu, gun jaise hathyaaron se kiye jaate hain. Kuch deegar aqsaam ke qatal bhi hote hain jin mein aam hathyaaron ka istemal nahin kiya jaata hai balki jinnat se madad li jaati hai yani sifli ke zariye karwa diye jaate hain. Is tarah ke qatal karne se dushman bahut mutmaeen rahta hai yeh soch ker ke un ke pakde jaane ke umkaanaat na ke barabar hain kyunki aam taur per jadu tona saabit karna mushkil ho jaata hai. Lekin dur andeshi ki kami se woh yeh bhool jate hain ke Allah (swt) ki pakad se aj tak koi nahi bacha.  
Dushman sifli se victim ko maarne ki koshish alag alag tareeqon se kar sakta hai jo ke sura-t e- haal per munhasar hai. Agar victim dushman se qareeb ho to aisi surat mein jadugar us ko khane mein kala jadu ki qhuraafaat milwa ker halaak karne ki koshish karne lagta hai. Kala jadu ke asaraat wala khana kha lena kisi zehereele khana khane se kam nahin hota hai. Bas jaise koi zeher bahut tezi se kaam karta hai jaise ki cyanide aur koi slow poison hota hai waise hi jadu wale khane se victim per asar tezi se ya dheere dheere ho sata hai. Koshish yahi ki jaati hai ke victim ko bahaane bahaane se zyada se zyada jadu waka khana khila diya jaae aaki us ke bachne ke koi ukmaanaat na ho.
Ek baar jadu wala khana victim ke mede mein pahunch jaae to woh aisa hota hai jaise kisi ne mede mein gond chipkaa diya ho. Yani gond chhuraana jitna mushkil hai waise hi aise khane ke asaraat chhuraana bhi mushkil ho jaata hai. Isi liye sab amil victims ko aam taur per mashqook logon ki di hui koi bhi cheez khane se sakhti se mana karte hain.
Is qism ka khana agar kisi ne ghalti se kha liya ho to us ki alaamaat yeh hain:
·         Achanak ulti aana bilaawaje, yani na badhazmi na kuch aur waaze waja.
·         Tabiyat nidhaal rahna yani jism mein tawaanaai ki kami mehsus hona. Namaz tak padhne ki himmat na hona
·         Dil ghabraana
·         Sar mein bhaaripan aur shadeed dard
·         Bhook na lagna.
·         Daraaone khwaab dikhna
·         Jism per bilaawaje neel padna
Jadugar jaante hain ke agar kisi shakhs ko jadu ke zariye khatam karna ho to sab se pahle us ki quwat- e –mudafiyat ko khata karna padta hai. Yeh quwat hamare jism ko beemariyon se ladke ki taqat deti hai. Yeh quwat mutawaazan ghiza se mazbut rahti hai. Lehaza halaakat wale jadu ke victims ko jinnat musalsal behkaate rahte hain taaki woh khana khana band ya bahut kam karde. Aise victims ko jadu ke zariye aisa behkaaya jata hai jaise unhe bhook hi na ho. Agar jadu ki rok thaam karne wala koi na ho to aise victims din ba din kamzor hote chale jate hain. Ek baar unke jism ka quwat-e mudafiyat kamzor pad jae to phir victim ka jism beemariyon/infections ki amaajgaah ban sakta hai. Zara si bimari ya infection jaan leva sabit ho sakti hai aur jadugar yahi chahte hain.
Dusre maamlaat mein aisa hota hai ke victim jadugar aur dushmanon ke chungal mein na phansa hua ho yani ke woh kahin dur maqaam karta ho. Aise mein kuch khilaana pilaana victim ko zara mushkil hai. To jadugar dur se hi vaar karte hain jadu ka jis ki alaamat yeh hai ke victim ko phande lagte hain jo jaan leva bhi saabit ho sakte hain. Kabhi victim ko mehsus hota hai jaise koi kali si cheez mun ke raaste se halaq mein daaqhil hogai hai aur us ke fauran baad zordaar phanda lagta hai. Kisi kisi victim ko dawa ki koi goli khate hi aisa mehsus hone lagta hai jaise woh goli halaq mein badi hoti ja rahi hai aur us ke baad unhe phanda lag jata hai jis ke waje se un ka saas lena mushkil ho jaata hai. Victim aise jaan leva hamlon se bach nikalta hai ya nahin yeh is baat per munhasir hai ke who kitna mehfuz hai. Tahaffuz  ibaadah se bhi milti hai aur Ayatal Kursi etc ka taweez pehenne se bhi kyunki aise taweezon per amil bahut taqatwar moakkilon ko muqarrar karte hain.
 
Duaaon mein yaad rakhein
Amel Soname


WASWASE WALE JADU KI ALAAMAAT


Assalam oalaikum,
Kuch logon ka manna hai ke ek khaas qism ka jadu hota hai jis se victim ke zehen mein waswase aate rahte hain. Yeh baat ek tarah se theek hai. Lekin khaastaur se waswase daalne ke liye koi jadugar jadu nahin karta. Jadugaron ke kuch khaas maqaasid hote hain. Agar un ka client un se kahe ke hame victim ki sehat kharab karwaani hai to victim ko beemar karna un ka maqsad ban jaega. Agar koi client un se yeh kahe ke hame victim ke kaarobaar per bandish lagwaani hai to yeh jadugar ka maqsad ban jata hai. Kamyab hone ke liye jadugaron ko bahut si baton ko maddenazar rakhte hue ek mansuba tayyar karna padta hai jo us mamle mein sab se zyada munasib ho. Lehaza, jadugar victim ko kuch khilwa bhi sakta hai, us ke zehen mein waswase bhi dalwaa sakta hai, woh victim per hamla bhi karwa sakta hai apne bheje hue jinat ke zariye se aur victim ke jism ke kisi bhi hisse per faalij ka asar bhi karwa sakta hai.
Jadugaron ke paas saekdon tarkeebein hoti hain apna maqsad aasani se hasil karne ki. Ab woh apni sahulat ke hisab se kaunse tarkeeb ka istemal karta hai yeh us mamle per munhasir hai jo us ko mil jae. Waswase, dil mein ghabrahat taari karna, khaufnaak manaazir dikha ker daraana, jismaani takleef mein mubtila karna, Quran Paak padhte mein pareshan karna waghaira kuch hathyar hain jo jadugaron ko gande amal karne se haasil hote hain.
Jadugar agar kisi maamle mein waswase ka hathyar istemaal karta hai to aise mein victim ko jinnat ke waswase kya hote hain, yeh buniyaadi baat jaanna bahut zaruri hai. Beqhabri ke aalam mein to victim ko kafi nuksan uthaana pad sakta hai. Kyunki agar kisi ko yeh khabar hi na ho ki us ka dushman kaunse hathyar se us per vaar karega to woh apne aap ko bachaega kaise? Dushman se apne aap ko mehfuz rakhne ke liye ko us ki har chaal per nazar rakhni zaruri hoti hai khastaur se tab agar woh kala jadu ka istemal kar raha ho victim ko maghloob karne ke liye
Waswase woh khayal hote hain jo aap ke zehen mein khud paida nahin hote hain qudrati taur per. Yani ke aap woh sab khud nahin soch rahe hote hain balki woh sab aap se ‘sochwaaya’ ja raha hota hai masnui tareeqe se. Dusre alfaazon mein, woh khayaalaat aapke zehen ki taqhleeq nahin hote hain balki jadugar jinnat ke zariye aap ke zehen mein dalwaa dete hain. Misaal ke taur per agar jadugar ko victim ka hausla past karna ho to woh victim ke zehen mein yeh waswasa (khayal) dalwa dega jinnat ko zariye se ke, ‘Main kisi qabil nahin hun’. Agar jadugar ko kisi victim ko khudkushi karne ke liye uksaana ho to ache bhale haalaat wale victim ke zehen mein yeh khayal bhejega, ‘Mere zinda rahne ka koi maqsad nahin hai. Mujhe mar hi jaana chahiye..mujhe koi bhi pasand nahin karta..mujhe chala hi jana chaiye’.
Is tarah se jitney jadu karwaane ke muqhtalif maqaasid hain duniya mei utne hi mukhtalif qism ke waswase victims ke zehen mein aa sakte hain. Victim ko hoshmandi se kaam lena padta hai. Us ko apne dushman aur uski har chaal ko samajhna chahiye. Yeh sab thodi mashq se aata hai. Lekin agar aap koshish karien to namumkin bhi nahin hai. Ek baar aap in jinat ke waswason ke raaz ko samajh lein phir duniya ka koi bhi jadugar aap ko bewaquf nahin bana sakega, na hi dara sakega, na dhamka sakega, na behka sakega aur na hi aap ke zehen ko apne qabu mein la sakega.

Duaaon mein yaad rakhein
Amel Soname


MOHABBAT WALE JADU KI ALAAMAAT


Assalam oalaikum,

Is qism ke jadu ko tantric mohini kahte hain. Jadu chahe kisi ki mohabbat hasil karne ke liye hi kyun na kiya jae lekin jadu jadu hi hota hai. Yeh gunah-e- Kabeera hai aur jadu karne wale ka Aakhrat mein koi hissa nahin hai. Waqti fawaaid ke liye jadugar aur jadu karwaane wale apni Aakhrat kharab kar lete hain.
Kisi ki mohabbat hasil karne ke liye dua bhi ki ja sakti hai aur jaez tarah se bhi hasil ki ja sakti hai Ism-e-azam ke zariye jaise ke: Ya Buduhu ya Ya Wadudu. Lekin tedhi ungli se ghee nikaalna kuch logon ki fitrat mein shaamil hota hai.
Is qism ke jadu se kisi ko bhi nishaana banaya ja sakta hai, chahe woh aurat ho ya mard, kanwara ho ya shadishuda. Is qism ke jadu ko todne se qibl us ko pehchaanna zaruri hota hai victim ke liye. Is jadu ki alaamat yeh hai ke aap ko koi shakhs bura lagta hoga ya aap ko us mein koi khaas dilchaspi nahi hogi lekin achanak aap ghaur karienge ke aap ke khayalaat badal gaye hain. Aap us shakhs mein na sirf dilchaspi lene lagenge balki us ke deewane hojaenge. Sote jaagte uthte baithte us shakhs ki tasveer aap ke zehen mein ubharti rahegi. Aap apna dhyaan hataana bhi chahenge to kamyabi nahin milegi. Yahi nahin, balki jo gande amal aap per kiye ja rahe honge un ka maqsad aap ko buri tarah se kisi ke pyar ke jaal mein phansaane ka hota hai. Is maqsad ko hasil karne ke liye jadugar koi kasar nahin chhorta hai. Lehaza victim ko rijhaane ki zordar koshish ki jaati hai. Victim ke zehen mein us per jadu karne wale ki purkashish tasweer dikhai jati hai bewakuf banane ke liye. Is ke alawa victim ki jinsi khwahishaat ko jagaane ki koshish bhi ki jaati hai.
Agar victim jadugar ke hathkande na samajh paye tp phir woh jaal mein buri tarah phans jaega aur mumkin hai ke apni poori zindagi kharab karle. Woh yeh samajhne lagega ke us ko jadu karne wale/wali se shadeed mohabbat ho gai hai aur us ke baghair ab guzaara hi nahin hai. Jadu ke zer-e-asar victim shadi ke maamle mein ghalat inteqhaab kar leta hai. Us ka shaoor baqi nahin rahta aur aqil khapt kar dete hain jadugar. Aisi haalat mein victim jadu karwaane wale ka zeheni taur per ghulaam hojata hai aur woh sirf wahi karta hai jo jadu karwaane wala chahta hai. Victim phir apne ma baap se bhi lad sakta hai aur jo bhi us ko apne raaste mein aata hua dikhega –woh us ke khilaaf ja sakta haii. Us ke andar sahi ghalat samajhne ki aqil baqi nahin chhorte hain jadugar.  
Jahan ek taraf victim ki haalat qabil-e-raham hoti hai wahin dusri taraf us ko phansaane wale apni aqil ki daad de rahe hote hain aur us per hans rahe hote hai.

Duaaon mein yaad rakhein
Amel Soname

TANGDASTI WALE JADU KI ALAAMAAT

Assalam oalaikum,

Jab kisi ka dushman us ko haraana chahta hai to who yeh koshish karta hai ke victim ko ma’ashi taur pe kamzor kar de. Is ke liye who jadugar ki madad le sakta hai. Jadugar apne jinnat ko victim ke piche laga deta hai jo us ke rozgar per bandish lagaa dete hain. Nateeja yeh hota hai ke victim ki achi bhali mulazimat khatam ho jati hai. Waja koi bhi ho sakti hai, chahe kisi sath ke mulazim se ladai ho ya boss se jhadap. Bas victim he ird gird aisa mahaul paida kar diya jata hai ke us ka mulaazimat jaari rakhna mumkin hi na rahe.
Dusri alaamat is jadu ki yeh hai ke jab ek baar hataae jane ke baad victim kahin aur mulazimat dhundta hai jo usko kahin se koi jawab nahin milta hai. Yeh sab victim ke paas a’ala taalim aur sath mein tajurba hone ke bawajud hota hai. Agar kisi peshe mein koi shakhs pahli dafa daakhil hone ja raha ho aur us ko yeh sab dikkatein pesh ayein to is mein koi tajjub ki baat nahin hai. Lekin jadu ke zer- e- asar victim chahe kitna hi tajurbekaar kyun na ho lekin us ko nayi mulaazimat dhundne mein bahut pareshani hoti hai.
Kuch maamlaat mein ek ghar ke sabhi afraad per jadu karwa diya jata hai. Ache bhale qabil ladke berozgar kar diye jate hain jis ke waje se unhe  ma’ashre mein ma’ashi pareshani ke alawa aur bhi kai qism ki dikkaton ka saamna karna padta hai.
Teesri alaamat yeh bhi hai ke kuch maamlaat mein victim ke zehen mein aise waswase dalwaye jate hain jinse uski apne kaam per se tawajjo hat jaae. Jab kisi ki us ke maqsad per se hi nazar hat jaegi to phir bhala who kis tarah se kayab ho sakega? Yeh ek chaal hoti hai jis ko agar koi samajh na saka to phir gaadi ek tarah se patri se hat jaati hai. Phir guzare ke liye koi chota mota kaam dhundna pad jata hai aur in mein bhi dikkat pesh asakti hai. 
Duaaon mein yaad rakhein
Amel Soname


Saturday, November 8, 2014

BIMAARI WALE JADU KI AAM ALAAMAAT

Assalam oalaikum,
Jadu ke zariye se dushman victim ko sinus jaisi maamuli bimari se leke sartaan jaisi jaan leva bimaari tak mein mubtila kar sakte hain. Ab sawaal yeh paida hota hai ke koi is baat ko kaise samjhe ki kaun si bimari qudrati hai aur kaun si jadu ke waje se hai? Kai bimaariyan budhaape ki alaamat hoti hain. Kisi ki umar raseeda hone ke waje se agar binai kamzor pad jae ya uski ankh mein agar jaala aajae to aise mein us ka yeh shak mein padna ke kahin us per kisi ne jadu to nahin kara diya hai-ghairmunaasib hai. Lekin agar kisi naujawaan ki ankhon ki roshni tezi se kam hone lage bina kisi waaze waje ke, yani us ki ghiza bhi mutawaazan ho aur us ke sath koi haadsa bhi pesh na aaya ho-to aise mein yeh baat fikr ka baais hoti hai. Us se bhi zyada parshankun baat yeh hogi ke aise shakhs ke gharwale asli masle se bekhabar hon aur woh us shakhs ka roohani ilaaj karwane ke bajae us ko doctors ke paas liye phirein. Jab koi roohani mareez doctors/hospitals ke dhakke khayega to us ko koi faeda nahin pahunchega. Afsos ki baat yeh hai ke aksar log kisi bhi bimaari se do char hote hi bina soche samjhe doctor se taqarur le lete hain.
Is qism ke jadu ki alaamatein mandarje-zael hain:
·         Doctor chahe koi kitna hi qabil kyun na ho lekin victim ko us ki dawa se koi faeda nahin hota. Thoda bahut waqti taur per aaraam pahunch sakta hai lekin jadu jab tak jad se nahi kat ta tab tak mukammal taur per shifa milni namumkin hoti hai
·         Doctors case ki noyiyat ko na samjhte hue jab yeh dekhte hain ke victim ke marz mein koi afaaqa nahin hai to woh us ko aur tez dawaaein dena shuru kar dete hain
·         Bilaawaje allopathy ki garam dawaaein khane se victim ki haalat aur ghaer hone lagti hai.
·         Is dauran jadugar victim aur us ke ird gird ke logon ki bekhabri aur bad-hawaasi se faeda uthaate hue jadu ko dohraata rahta hai tab tak ke victim ko takleef de de kar adhmara na kar de.
Jadugar ko poore maamle se baaqhabar rahna zaruri hota hai taaki agar aisa ho ke victim ko kisi shae se faeda pahunch gaya ho aur us ke marz mein afaaqa ho raha ho to woh dobara zordar jadu karke victim ki haalat pahle jaisi abtar kar sake. Bekhabar logon se maamle ki tafseel maalum karna aur victim ka haal ugalwaana koi mushkil kaam nahin hai. Apni makkari aur chalaki se dushman maamlat mein hone wali radd-o-badal se waqif rahta hai aur us ka jadu ba-asar saabit hota hai.
Baaz maamlaat mein yeh bhi dekha gaya hai ke dushman victim per zordar jadu karne ke liye chahta hai ke victim aisa koi bhi kaam na kare jisse jadu kat jae. Lehaza, dushman bahla phusla kar victim ko taweez waghaira pehenne se rokna chahta hai- ghalat qism ke aqeede ka mazaahira karte hue- ke yeh sab shirk hai halanki jis taweez mein Qurani dua ya naqsh ho to us mein shirk ka pahlu kahan se ayega?
Victim ko mazeed pareshan karne ke liye makkar dushman deewaron per naqsh lagaane se aur agarbatti jaisi paak aur bezarar shae ke istemaal se bhi rokte hain.

Duaaon mein yaad rakhein
Amel Soname

Friday, November 7, 2014

JADU SE HONE WALI JISMAANI TAKLEEF KI ALAAMAAT

Assalam oalaikum,
Baaz awqaat dushman ya to hasad ke waje se ya apna ullu seedha karne ki niyat se victim ko jismaani takleef pahunchwaane ke liye jadu karwaate hain. Takleef jism ke kisi bhi hisse mein ho sakti hai lekin woh shadeed tareen hoti hai. Lehaza victim ke ghar wale Ruqyah na kar ke agar victim ko takleef mein mubtila dekh ker hospital leke daudne lagein to victim ki haalat bad se badtar ho sakti hai.
Is qism ke jadu ki alaamaat mandar-je-zael hain:
·         Achanak ya rafta rafta kar ke dard ki lehar si uthne lagti hai victim ke jis mein
·         Dard ki koi bhi khaas waja samajh mein nahin aati hai, na to chot lagne se hota hai woh aur na hi kisi aur waazae waja se.
·          Dard ki jaga per ghaur se dekhne per koi halka sa zakhm numaaya hota hai ya khurant. Yeh jinnat ke hamle ki nishani hoti hai.
In tamaam baaton ka nichor yeh hai ke agar victim apni la-ilmi ke waje se apni takleef ko koi achanak paida hone wali bimari samajh baitha tab to us ki khair nahin. Aisi surat-e-haal mein yeh alaamaat dekhi jati hain:
·         Doctors mukhtalif tarah ke tests karwa lete hain jin mein sab kuch sahi hota hai.
·         Phir woh seher ke victim ko dimaghi mareez qaraar  dete hain aur ulta seeda ilaj shuru kar dete hain. Yeh is liye kyunki medical istelaahat mein ek khas qism ki bimariyon ka group hota hai jis ko somatoform disorders kaha jata hai. Is ki tashreeh dekhi jae to woh yeh hai ke somatoform disorders zehni bimaari ka ek group hai jis mein jismani takleef hoti hai mareez ko lekin us takleef ki koi waja nahin hoti hai. X-ray, MRI reports mein kisi qism ki gadbad nahin dikhti hai aise maamlaat mein. Yeh is liye hota hai kyunki jo dard jinnat de rahe hon woh science saabit nahin kar sakta hai. Nateeja yeh hota hai ke doctors bina soche samjhe victim ko zehni mareez saabit kar dete hain aur us ki pareshaniyon mein mazeed izaafa bhi.
   
Is qism ki aziyat se bachne ke liye yeh zaruri hai ke jadu se paida kiye jaane wale dard aur qudrati dard mein farq ko samjha jaae.
Duaaon mein yaad rakhein
Amel Soname

Tuesday, November 4, 2014

ZEHEN PER QAABU PAANE WALE JADU KI ALAAMAAT

Assalam oalaikum,
Taqreeban har qism ke jadu mein jadugar ko apna maqsad haasil karne ke liye victim ke zehen ko apne qaabu mein karna padta hai. Sirf chand aqsaam ke jadu aise hote hain jin mein jismaani takleef dene ke liye jadugar waswason ka sahaara nahin leta hai balki baraahe raast hamla karwaa deta hai. Warna agar victim ko beemar aur kamzor bhi karna ho to jadugar ke jinnat us ko behkaate hain taaki woh apni ghiza per dhyaan na de ya ulti seedhi cheezien khaye.
Yaani yeh jadu ki koi khaas qism nahin hai balki lagbhag har jadu mein jadugar is hathkande ka istemaal karta hai taaki woh kamyab ho sakte. Zaahir si baat hai ke jin logon ki quwat-e-iraadi mazbut hoti hai un ko apni mutthi mein karna jadugar ke liye mushkil kaam hota hai banisbat un logon ke jo muntashir khayaalaat ke hote hain. 
Jis tarah se gunde badmash paise hathyaane ke liye bhole bhaale logon ko daraate- dhamkaate hain waise hi sifli ke jinnat bhi victim ko dara ker us ke zehen per qaabu pane ki koshish karte hain taaki phir victim per haebat taari ho jae aur woh wahi kare jo jinn kahe.
Jab zehen per qabu paane ki zordaar koshish chal rahi hoti hai to us ki alaamaat mandarje zeal hai:
·         Jadugar ka jinn aksar victim ke zehen mein us ke dushman ki awaz mein waswase daalta hai. To victim ko lagega jaise us ka dushman us ko daraa raha hai ya betuki baatein kar raha hai.
·         Zehen mein hukum dene ki awaazein aati hai, jaise dushman victim ko hukum de raha ho ke, ‘Chalo, yeh kaam karo ya yeh ke, ‘Falaan falaan ka phone receive karo’.
·         Behkaane wale khayaal zehen mein aate hain jo victim ko bar bar kaam ke beech mein pareshaan karte hain aur us ka dhyaan kaam per se hata dete hain. Jab victim koi kisi khaas kaam karne se rukwaana hota hai to us ko mashghol dekhte hi jinnat kasrat se waswase daalne lagte hain taaki victim kaam theek se na kar paae.
·         Victim ko khaufnaak qism ke manaazir dikhaae jaate hain. Raat ke waqt khaastaur se daraane ki zordar koshish chalti hai.


·         Daraana, dhamkaana, behkaana, bewaquf banana, zehen uljhaana is tarkeebon ke zariye jinnat victim ke aasaab ko kamzor karne ki koshish karte hain. Jaise gunde badmaashon ka kaam logon ko daraane dhamkaane se chalta hai waise hi in jinnat ka bhi. Misaal ke taur per jinnat jaanbujh ker victim se kahta rahega ke ‘tumhare waaldain guzar jaenge’ ya agar koi aur kamzori dekhega victim ki to us se faeda uthaane ko koshish karega. Maslan agar jinn dekhe ke victim koi imtehaan dene jar aha hai aur fikrmand hai to woh waswase daaleinge ke, ‘tum fail ho jaoge. Phir fail hone ke baad tumhara kya banega? Agar badnaseebi se victim yeh sab samajh nahin saka ke us ke sath kya kiya ja raha hai to phir woh kamzor pad jaega. Us ke baad dimagh to victim ka hi hoga lekin us per hukumat jinnat ke zariye se jadugar ki.
·         Jadu ka asar agar badh jaae to victim ko aisa lagne lagta hai jaise us ka dimagh us ke qabu mein nahin hai. Woh na chahte hue bhi zyada bolne lagega aur beqaabu ho jaega.
·         Aksar aise victims ko yun lagta hai jaise unhe koi laashaoor mein awaz de raha hai.   
Agar aap ke zehen mein aksar is qism ke manfi khayaalaat aate hon jin ke waje se aap ke ooper khauf taari ho jae aur aap ko aisa lagne lage jaise aap ke sath kuch bura hone waala hai to samajh lein ke ki koi dushman jadu ke zariye se aap ko apna nishaana banana chah raha hai

Duaaon mein yaad rakhein
Amel Soname

Saturday, November 1, 2014

KALA JADU KI TASHREEH

Assalam oalaikum,
Kala jadu ki alaamaat ki mukammal fehrist se waaqfiyat agar ho jae to insan ko yeh samajh mein ajaega ke agar us per kala jadu karwayaa gaya ho to us ke sath kaun kaun si diqqatein pesh aasakti hain. Is jaankaari se tasweer saaf ho jaegi aur victim kaafi had tak chawkanna rah sakega. Lekin thodi si kasar phir bhi baaqi rah jaegi. Kala jadu ke maamle mein khud ko achi tarah se musallah karne ke liye aap ka yeh bhi jaanna ahmiyat rakhta hai ke jadugar kaun kaun se aqsaam ke jadu kar sakta hai aap per. Yani jadugar ko shaitan kaun kaun se ghalat kaam karne ki taaqat deta hai jis se jadugar logon ko pareshan kar sakta hai. Yeh jaanne se hi aap ki jaankari mukammal hogi aur phir aap apne dushman ki kisi bhi chaal se ghaafil nahi rahenge.
Maine apne 20 saala amalyaat ke kaam ke dauraan saekdon maamle dekhe hain. Apne tajurbe ke bina per maine ek fehrist tayyar ki hai jo mandarje-zael hai. Is ko padh ker aap ke samajh mein ajayega InshaAllah ke hamari zindagi ka koi bhi pahloo jadu se mehfuz nahin hai aur yeh ke hame kin kin maamlaat mein mohtaat rahne ki sakht zarurat hai.
·         Kala jadu ke maidan mein umar ki koi had nahin hai. Chote bachon se le ker zaeef logon tak ko is pareshani ka saamna karna pada hai har daur mein. Kisi ke bhi bache se ya ladke se jal kar us per sehat kharab karne wala jadu kar diya jata hai. Is jadu ki alaamat yeh hai ke bacha din ba din kamzor hota chala jaata hai. Agar jadu zordar hua aur bache ko koi taweez waghaira nahin pehnaaya gaya ho to aise mein jaan bhi ja sakti hai.
·         Jadu se bachon ki taaleem ko nishana banaya ja sakta hai jis ki alaamat yeh hoti hai ke acha khaasa muta’aale ka shauqeen taalib-e-ilm padhai se badzann ho jata hai.
·         Bache ke baaligh hote hi us dushman us ko gumrahi ke raaste per daalne ki koshish kar sakta hai jis se victim ke waaldain ki bhi ruswaai hoti hai aur victim ka mustaqbil bhi daao per lag jaata hai. Is qism ki jadu ki alaamat yeh hai ke victim ke rawaiyye mein achanak tabdeeli asakti hai- jaise ke woh buri sohbat mein uthna baithna shuru kar dega aur us ko buri lathein lag jaengi. Agar victim namaz pabandi se padhta ho to is jadu ke asar se woh benamazi hojaega
·         Baaz dushman victim ko naakaara sabit karne ke liye un ki mulaazimat per bandish laga dete hain. Is ki alaamat yeh hai ke victim chahe jitna hi qabil kyun na ho lekin us ko kahin mulaazimat nahin milti. Agar mil bhi jae to jadugar bandish ko dobara laga ker victim ko phir se berozgaar bana deta hai. Nateeja yeh hota hai ke sab victim ko na-ahal aur nikama samjhna lagte hain.
·         Lalchi qism ke log kisi bhi ladke ya ladki ki daulat ya kisi aur khoobi ko dekh ker us per seher karwa ker aur usko shadi ke liye phansaa lete hain.
·         Dusri taraf dushman seher karwa ker kisi bhi ladke ya ladki ki shadi mein rukaawat dalwaa sakte hain. Aise mein payaam aane band ho sakte hain, kahin bhi bani banaai baat aen mauqe per tut sakti hai ya ladke/ladki ko shadi se badzann kar diya jata hai taaki woh shadi karne se inkar kardein.
·         Kai maamlaat mein seher ke zariye victim ki azdawaaji zindagi ko barbaad kar ke maamla talaaq tak pahuncha diya jaata hai. Is ki alaamaat yeh hai ke miya biwi ke darmiyaan achanak ladai jhagda shuru ho jata hai aur un ke ghar ka sukoon ghaarat ho jata hai. Un ke beech ki mohabbat nafrat mein tabdeel hojati hai aur log samajhte hain ke aapas mein ban nahin rahi hai.
·         Aulad ki paidaish per bandish yani aurat ko baanj banana aur hamal ka na theherna jaisi aziyatein bhi jadu ke zariye dushman victim ko de sakte hain.
·         Kisi ko ma’ashare mein badkirdaar sabit karne ke liye dushman jadu ka hathkanda istemaal kar sakta hai. Is ki alaamat yeh hai ke victim ki jinsi khwahishaat badhaa di jati hai taki woh beqabu ho jae aur zina kar le.
·         Aisi saekdon aqsaam ki bimariyaan hain jin mein victim ko mubtila kiya ja sakta hai jadu se. Is aqsaam ke maslon ko pehchaanna aasaan hai kyunki in bimariyon mein dawa be-asar ho jaati hai. 
Yeh sirf kuch khaas aqsaam ke jadu aur unki alaamaat hain. Is ke alaawa jadugar apne client ke ishare per kuch bhi kar deta hai. Jin logon ka Imaan mazbut nahin hota hai woh chahte hain ke har maamla unki marzi se chale, woh Allah (swt) ki Marzi ke aage sar jhukaane ke bajae yeh chahte hain ke aur log un ki marzi per chalein . Aise log Allah (swt) ki Chaahat se badh ker apni chaahat ko ehmiyat dete hain. Lehaza, woh har surat-e-haal ko jadu ki madad se apni marzi ke mutaabiq banaane ki koshish mein lage rahte hain aur is tarah se na jaane kitne mazloom logon ko apne jadu ka shikaar bana lete hai.             
Duaaon mein yaad rakhein
Amel Soname